NBI agent unang testigo ng prosekusyon sa impeachment trial

Sinimulan na ng House prosecution team ang presentasyon ng kanilang unang testigo sa impeachment trial laban kay Vice President Sara Duterte nitong Martes, Hulyo 7.
Nanumpa at humarap sa Senado si NBI Agent John Mark Calilung.
Si Calilung ang parehong ahente ng National Bureau of Investigation (NBI) na tumestigo noon sa pagdinig ng House Committee on Justice.
Noon, sinabi niyang dumaan sa authentication process ng NBI ang video kung saan umano’y nagbanta si Duterte laban kina Pangulong Ferdinand Marcos Jr., First Lady Liza Marcos at noo’y House Speaker Martin Romualdez.
Sa pagpapatuloy ng paglilitis, sinimulan ng prosekusyon ang pagtatanong kay Calilung kaugnay ng ikaapat na artikulo ng impeachment, na may kaugnayan sa naturang umano’y pagbabanta ng bise presidente.

====