Marking of evidence sa VP Sara impeachment trial tapos na

Natapos na nitong Huwebes, Hunyo 25, ang marking of evidence sa pre-trial conference ng impeachment case laban kay Vice President Sara Duterte matapos ang limang araw.
Sa pre-trial conference na nagsimula noong Hunyo 18, minarkahan ng House prosecution panel, defense team ni Duterte, at impeachment clerk of court ang mga ebidensya at tinukoy ang mga posibleng testigo para sa impeachment trial.
Sa unang araw, tinalakay at natapos ng magkabilang panig ang Article III at IV ng impeachment complaint, na may kaugnayan sa umano’y panunuhol ng Bise Presidente sa ilang opisyal ng Department of Education at pagbabanta kina Pangulong Ferdinand Marcos Jr., First Lady Liza Araneta-Marcos, at dating Speaker Martin Romualdez.
Samantala, tumuon ang ikalawa hanggang ikalimang araw sa Article I at II, na tumatalakay sa umano’y maling paggamit ng confidential funds at hindi maipaliwanag na yaman ng Bise Presidente.
Nakumpleto ng House prosecution team at ng kampo ni Duterte ang pagmamarka at pagtukoy ng mga ebidensyang ihaharap ng mga ito sa impeachment trial, na nakatakdang magsimula sa Hulyo 6.