Lebel ng tubig sa Angat dam, patuloy na bumababa

Patuloy na bumababa ang lebel ng tubig sa Angat Dam dahil sa nakaambang matinding El Niño, sa kabila ng inaasahang pag-ulan dulot ng habagat noong Hulyo.
Noong Hulyo 25, bumaba sa 150.60 meters above sea level (masl) ang lebel ng tubig sa dam—ang pinakamababang naitala ngayong taon.
Ayon sa mga residente, paminsan-minsan lamang umuulan at inaabot pa ng ilang araw bago muling magkaroon ng pag-ulan. Noong Hunyo, nakapagtala ang PAGASA ng 20 hanggang 60 porsiyentong mas mababang ulan sa karamihan ng bahagi ng bansa.
Dahil sa mababang tubig, lumiit ang huli ng isda at mas nahirapan ang mga residente sa pagbiyahe at pagkuha ng mga suplay. Karamihan sa mga Dumagat ay umaasa sa pangingisda bilang pangunahing kabuhayan.
Samantala, ibinaba ng National Water Resources Board (NWRB) ang alokasyon ng tubig para sa Metropolitan Waterworks and Sewerage System (MWSS) mula 48 cubic meters per second (cms) sa 46 cms dahil sa patuloy na pagbaba ng lebel ng tubig sa Angat Dam.
====