Kiko Pangilinan sa pagiging impeachment manager

Sinabi ni Senador Francis “Kiko” Pangilinan noong Huwebes, Mayo 7, na wala pang pinal na usapan sa suhestyon na siya ang maging “impeachment manager” sa posibleng impeachment trial laban kay Vice President Sara Duterte.
“Pinag-aaralan ko pa,” ani Pangilinan.
“It’s just a suggestion…It was discussed but nothing has been finalized.”
Noong Miyerkules kasi ay sinabi ni Senate President Pro-Tempore Panfilo “Ping” Lacson na tinatarget ni Senate President Vicente “Tito” Sotto III si Pangilinan na maging “impeachment manager” sa posibleng impeachment trial laban kay Duterte lalo na sa background nito bilang abogado.
Ani Lacson, ito ay naaayon din sa suhestyon ni Senate Majority Leader Juan Miguel “Migz” Zubiri.
Ang impeachment manager ang magsisilbing “defacto majority leader” na maglalatag ng direksyon sa paglilitis.
“Mostly administrative. Just for the smooth orderly proceedings,” ani Pangilinan.
Kailangan ding amyendahan ng Senado ang impeachment rules para pormal na likhain ang tungkulin ng isang impeachment court administrator.
“Pinagaaralan ko pa…ayaw ko madiskaril yung mga bills na pending, ‘yung agri coops, agri extension service, ‘yung agri com, lahat ng agri dahil ‘yun naman talaga ang ating dahilan bakit tayo nanalo. ‘Yun ang pinangako ko sa ating mga botante,” sinabi pa niya.
Umabot na sa plenaryo ng Kamara ang Articles of Impeachment at isinama sa Order of Business ng Kamara noong Miyerkules.
Inaasahang isasagawa naman ang botohan ng plenaryo sa Articles of Impeachment laban kay Duterte sa Mayo 11.
Nasa 1/3 o 106 na boto ng lahat ng 318 House members ang kailangan para ma-impeach si Duterte at maipadala sa Senate impeachment court sa paglilitis.