Kapakanan ng mga magsasakang maaapektuhan ng Pax Silica, ‘di dapat isantabi 

Iginiit ni Senador Francis “Kiko” Pangilinan na hindi dapat isantabi ang kapakanan at saloobin ng mga magsasaka at iba pang komunidad na maaapektuhan ng Pax Silica project sa Capas, Tarlac.
Ayon sa kanya, kailangan ng tunay na public consultation at dapat isama sa pagpaplano ang mga maaapektuhang residente, lalo na ang mga magsasaka at katutubo.
Binigyang-diin din ni Pangilinan ang kahalagahan ng free, prior, and informed consent (FPIC) upang matiyak na walang pilitan, pananakot, o kakulangan sa impormasyon sa mga komunidad na maaapektuhan.
Lumalakas ang pangamba ng ilang sektor na maaaring magdulot ang proyekto ng pagpapalayas sa mga komunidad, pagbawas ng lupang sakahan, at pagkapinsala sa suplay ng tubig, dahil sa malaking pangangailangan nito sa lupa at tubig.
Sinabi ng senador na bubusisiin ng Senado ang mga detalye ng Pax Silica sa mga susunod na pagdinig upang matiyak na mapoprotektahan ang interes ng mga ordinaryong Pilipino.
===