Nagtamo ng isang malaking tagumpay ang kapulisan sa Bataan nang hatulan ng habambuhay na pagkakulong ang isa pang indibiduwal na may pagkakasalang may kaugnayan sa iligal na droga.
Sa ulat mula kay PColonel Marites A. Salvadora, provincial director ng Bataan, ang hinatulan ng habambuhay na pagkabilanggo ay isang nagngangalang “Joy”.
Ang kaso ay nag-ugat sa isang operasyon ng paniktik na isinagawa noong Agosto 5, 2025, sa Mariveles, Bataan ng mga tauhan ng Bataan PPDEU at Mariveles MPS, na nagresulta sa pagkakakumpiska ng humigit-kumulang walong gramo ng shabu na nagkakahalagang PhP54,400.00 at isang .45 caliber Colt pistol na may tatlong bala.
Hinatulan ng Regional Trial Court Branch 95 sa Mariveles, Bataan ang akusado ng habambuhay na pagkakakulong at multang PHP500,000 para sa paglabag sa Section 5 ng RA 9165, nagpataw ng multang PHP400,000 para sa paglabag sa Section 11 ng parehong batas, at walong taong pagkakakulong para sa paglabag sa RA 10591.
Binigyang-diin ni PColonel Salvador na ang hatol ay nagpapaalala ng malinaw na mensahe na ang ilegal na droga ay walang lugar sa Bataan at ang kapulisan ay mananatiling walang humpay sa paghabol sa mga nagkasala mula sa pag-aresto hanggang sa matagumpay na pag-uusig.
Ang tagumpay na ito ay nagpapatibay sa patuloy na kampanya ng Bataan PPO laban sa ilegal na droga at mga loose firearms, kasama ang buong suporta ni PBGen Jess B Mendez, Regional Director, PRO 3.(Danilo Gravador)