Coco Martin, walang ineendorso na online gambling

Nilinaw ng kampo ni Coco Martin na ‘walang kaugnayan ang aktor sa anumang uri ng sugal o online gaming platforms na kumakalat online at iginiit na hindi niya ito ineendorso.
Sa isang pahayag ng CCM Film Productions noong Miyerkules ng gabi sa social media, binigyang-diin na anumang endorsement, post sa social media, o materyales na nagpapakita ng pangalan, mukha, o anumang koneksyon kay Coco sa gambling ay hindi awtorisado at mapanlinlang.
Pinayuhan ng kampo ang publiko na maging mapanuri at iwasan ang pakikilahok sa ganitong uri ng mapanlokong promosyon.
”Para sa mga opisyal na anunsyo at lehitimong endorsements, mangyaring tumingin lamang sa kanyang mga opisyal at beripikadong channels,” ani sa post ng CCM.
Si Coco, na nakilala sa mga sikat na teleserye, ay kasalukuyang naghahanda para sa bagong serye nito, kasama ang kanyang partner na si Julia Montes.
Una rito, sinabi ng Cybercrime Investigation and Coordinating Center (CICC) na may mga suspetsa ang mga ahensya ng gobyerno na may ilang celebrities at influencers na sangkot sa pagpapalaganap ng ilegal na online gambling.