Alex Eala magpapatuloy sa French Open buildup, sasabak sa 2 torneo sa Italy

Magpapatuloy ang paghahanda ni Alex Eala para sa French Open sa pamamagitan ng dalawang magkasunod na torneo sa Italy, matapos ang kanyang produktibong kampanya sa Spain.
Matapos umabot sa ikalawang round ng singles at doubles sa Mutua Madrid Open nitong weekend, sinabi ng 20-anyos na Filipina tennis star na determinado siyang bumalik nang mas malakas.
Bago iyon, magkakaroon muna si Eala ng isang linggong pahinga bago sumabak sa Internazionali BNL d’Italia sa Rome mula Mayo 5 hanggang 17.
Isa itong WTA 1000-level tournament, isa sa pinakamalalaking event bago ang French Open.
Kasama rin si Eala sa listahan ng mga lalahok sa Parma Ladies Open mula Mayo 12 hanggang 17, ngunit nakadepende pa ang kanyang paglahok doon sa magiging resulta ng kampanya niya sa Rome.
Ang mga clay-court tournaments na ito ang magsisilbing huling paghahanda ni Eala para sa French Open na gaganapin mula Mayo 24 hanggang Hunyo 7 sa Paris.
Si Eala, na nagtapos sa Rafael Nadal Academy, ay nakalaro na sa tatlong clay tournaments ngayong season bilang bahagi ng kanyang buildup. Gayunman, hindi pa siya nakalalagpas sa ikalawang round sa bawat torneo.
Sa Madrid Open, natalo siya sa second round kay Elise Mertens ng Belgium, 6-2, 6-1.
Sa doubles naman, natalo sila ng Turkish partner niyang si Zeynep Sonmez laban kina Katerina Siniakova at Taylor Townsend, 6-1, 7-5.
Sa kasalukuyan, nasa No. 44 si Eala sa world rankings at target niyang muling umakyat matapos maabot ang career-best No. 29 noong nakaraang buwan.