Alex Eala bumawi sa singles matapos maagang pagkalaglag sa Birmingham Open doubles

Mabilis na nakabawi ang Filipina tennis star na si Alex Eala mula sa kanyang naunang kabiguan matapos dominahin si Priscilla Hon, 6-0, 6-2, upang umabante sa ikalawang round ng Birmingham Open sa Great Britain nitong Martes, June 2 (oras sa Pilipinas).
Kontrolado ni Eala ang takbo ng laban at bagama’t nagpakita ng kaunting pagbuwelta ang katunggali mula sa Australia, napanatili pa rin ng pambato ng Pilipinas ang kanyang lakas sa unang pagsabak sa grass court season.
Ang panalong ito ay matamis na pagbawi para kay Eala na galing lamang sa pagkatalo sa first round ng doubles kasama ang kanyang Czech partner na si Nikola Bartunkova.
Dahil sa tagumpay na ito, nakatakdang harapin ni Eala sa susunod na round ang mananalo sa tapatan nina Greet Minnen at Alina Charaeva na kasalukuyan pang naglalaro habang isinusulat ang balitang ito.