Mas mahigpit na rabies prevention, ipinanawagan

Naninindigan si Senator Mark A. Villar sa mas mahigpit na rabies prevention at long-term animal welfare policies habang ginugunita ang Rabies Awareness Month ngayong Marso.
Ayon kay Villar, seryosong banta pa rin ang rabies sa Pilipinas ngunit 100% itong maiiwasan.
“Rabies virtually has a 100% fatality rate once symptoms appear, but it is also 100% preventable,” sabi niya.
Ipinakita niya ang datos: 300–400 Pilipino ang namamatay taun-taon, at may 4 milyong animal bite cases bawat taon. Umangat rin ang rabies-related deaths mula 235 noong 2020 hanggang 300 noong nakaraang taon.
Tumaas ang daily consultations sa Animal Bite Treatment Center ng San Lazaro Hospital mula 800 hanggang higit 3,000, na nagdulot ng pressure sa health personnel at vaccine supply.
Bilang solusyon, muling sinuportahan ni Villar ang dalawang panukala:
–Senate Bill No. 255 (Animal Medical Center Act) – pagtatayo ng public veterinary clinics sa bawat lungsod at munisipyo para sa abot-kayang preventive care, vaccinations, at spaying/neutering.
–Senate Bill No. 591 – promosyon ng adoption ng stray at impounded animals sa pamamagitan ng tax at iba pang incentives.
Ibinahagi rin ni Villar ang personal na karanasan ng kanyang pamilya sa pag-aampon ng aso sa PAWSsion Project noong 2024 at pinayuhan ang publiko na isaalang-alang ang adoption.
“Ilang kabataan na tulad ni Jamaica pa ba ang babawian ng buhay?” tanong niya, tumutukoy sa batang biktima ng rabies.
Hinihikayat ni Villar ang mga mambabatas at publiko na gawing konkretong polisiya ang kanilang malasakit, palakasin ang animal welfare laws, at panatilihin ang aksyon laban sa rabies upang maprotektahan ang kalusugan ng publiko.