35 bangkay narekober sa nasunog na Coron ship

Tatlongpung bangkay ang narekober mula sa MV June Aster, na nagdala ng kabuuang bilang ng mga nasawi sa 35.
Nagliyab ang MV June Aster noong Miyerkules ng gabi habang nasa karagatang sakop ng Coron, Palawan. Naantala ang search at retrieval operations dahil sa patuloy na apoy at masamang panahon, ngunit idineklara ng mga awtoridad na fire out na pagsapit ng Biyernes ng umaga.
“Ayon sa pinagsamang ulat ng mga awtoridad, may paunang bilang na 30 bangkay na narekober mula sa MV June Aster ngayong Setyembre 11, 2026, matapos ang deklarasyon ng fire out at kasunod na safety assessment,” pahayag ng PCG.
Sinabi ni PCG spokesperson Commodore Noemie Cayabyab na nagsimula ang retrieval at paglilipat ng mga bangkay bandang 5:16 p.m. gamit ang BRP Cape Engaño (MRRV-4411).
Ihahatid ang mga bangkay sa Port of Borac sa Coron, Palawan sa Sabado, Setyembre 12, at inaasahang darating sa pantalan bandang 11 a.m.
Bago ang pagkakarekober ng mga bangkay, lima lamang ang kumpirmadong nasawi at 43 ang nakaligtas.
Ayon sa PCG, ang pagkakarekober ng mga bangkay ay nagtaas sa pinakahuling tala ng mga nasawi sa 35 katao.