Defense ties, pinapabilis ng PH, NZ; SOVFA, GSOMIA tinututukan

Pinapabilis ng Pilipinas at New Zealand ang kanilang kooperasyon sa depensa habang isinusulong ang pagpapatibay ng Status of Visiting Forces Agreement (SOVFA), ayon sa Department of National Defense (DND).
Tinalakay nina Defense Secretary Gilberto Teodoro Jr. at New Zealand Defence Minister Christopher Penk ang naturang kasunduan sa sidelines ng 23rd International Institute for Strategic Studies (IISS) Shangri-La Dialogue sa Singapore noong Mayo 29.
Ayon kay Teodoro, layunin ng SOVFA na mas palawakin ang partisipasyon ng New Zealand forces sa mga military exercises ng Armed Forces of the Philippines tulad ng Balikatan at Salaknib, pati na rin ang kooperasyon sa disaster risk reduction.
“Assuming the SOVFA is ratified and approved by the Senate, we will immediately put in place the access arrangements and the agreements, especially the activities,” ani Teodoro.
Nilagdaan ang proposed SOVFA noong Abril 30, 2025 sa Maynila.
Ipinahayag din ni Teodoro ang konsepto ng Pilipinas bilang “venue for convergence” ng iba’t ibang bansa na may magkatulad na interes sa seguridad at kooperasyon.
Kasabay nito, isinusulong din ng Pilipinas at Japan ang isang General Security of Information Agreement (GSOMIA) para sa mas ligtas na palitan ng intelligence data. Ayon kay Teodoro, mahalaga ito para sa mas maayos na high-level defense cooperation.
Sinusuportahan din ng Armed Forces of the Philippines ang lumalalim na ugnayan sa Japan, kabilang ang posibleng pagkuha ng decommissioned Abukuma-class destroyer escorts bilang bahagi ng modernisasyon ng hukbong dagat.
Habang pinalalakas ang alyansa sa mga kaalyado, sinabi rin ng DND na patuloy nitong mino-monitor ang mga aktibidad ng China sa West Philippine Sea, kabilang ang mga ulat ng posibleng bagong istruktura sa Bajo de Masinloc.
Giit ni Teodoro, patuloy ang Pilipinas sa pagpapatibay ng depensa at internasyonal na alyansa habang nananatiling layunin ang pangmatagalang kapayapaan at katatagan sa rehiyon.