Patas na imbestigasyon sa gulo sa Senado siniguro

Tiniyak ni Department of Justice Acting Secretary Fredderick Vida na magsasagawa ng masusi at walang kinikilingang imbestigasyon sa insidente ng putukan sa loob ng Senate of the Philippines matapos isumite ng Philippine National Police ang ulat nito.
Ayon kay PNP Chief Jose Melencio Nartatez Jr., naipasa na sa DOJ ang mga rekord ng imbestigasyon, kabilang ang mga ulat mula sa Pasay City Police at mga dokumento tungkol sa seguridad sa pagitan ng Government Service Insurance System at National Bureau of Investigation.
Sinabi ni Vida na ang mga ebidensya, tulad ng mga video at testimonya, ay susuriin ng panel ng mga pampublikong tagausig.
Aminado si Vida na may mga ebidensyang nakalap, ngunit kinakailangan pa rin umanong patunayan ang mga ito.
“Susuriin namin ang mga timeline, mga pinagmulan ng video, at lahat ng ebidensya. Kailangan ang katotohanan,” dagdag niya.
Samantala, sinabi ni Interior Secretary Jonvic Remulla na alam na ni Pangulong Ferdinand Marcos Jr. ang mga nangyayari, ngunit wala pa umanong tagubilin mula sa kanya.
Kinumpirma ni Nartatez na narekober ang 44 na fired cartridges mula sa apat na baril, at patuloy na inaanyayahan si Senate Sergeant-at-Arms acting chief Mao Aplasca para sa karagdagang imbestigasyon.