3,500 iskul sarado pa rin sa Mindanao quake

 Nasa 3,500 paaralan sa Mindanao ang nananatiling sarado isang linggo matapos ang magnitude 7.8 na lindol na tumama sa Sarangani habang nagpapatuloy ang pagsusuri sa kaligtasan at integridad ng mga gusali, ayon sa Department of Education (DepEd).
Sinabi ni DepEd Assistant Secretary Jocelyn Andaya na libu-libong paaralan sa mga apektadong rehiyon ang napinsala, kung saan pinakamalubha ang epekto sa SOCCSKSARGEN. Batay sa paunang ulat, aabot sa 6,224 paaralan, mahigit 3.2 milyong mag-aaral, at 128,000 guro at kawani ang naapektuhan ng lindol at mga kasunod na pagyanig.
Ayon sa DepEd, magbabalik lamang ang klase sa mga apektadong lugar kapag idineklarang ligtas ng mga lokal na pamahalaan at mga inhinyero ang mga gusali ng paaralan. Patuloy rin ang inspeksyon at rehabilitasyon ng mga pasilidad sa mga lugar na sinalanta ng lindol.
Tumama ang magnitude 7.8 na lindol sa karagatan ng Sarangani noong Hunyo 8 na nagdulot ng pagkamatay ng dose-dosenang katao, pagkasugat ng daan-daang residente, at malawakang pinsala sa imprastraktura sa iba’t ibang bahagi ng Mindanao.
=====