Ipinagpatuloy ng ilang miyembro ng varsity chess team ng Unversity of the Philippines ang kanilang winning tradition nang manguna sila sa Quezon City-Wide chess team tournament (Grand finals, Battle of the District Champions) na ginanap sa Amoranto Sports Complex noong ika-30 ng Agosto, 2025.
Pinangunahan ni Francis Apollo “Kiko” Magpily, ang Most Valuable Player (MVP) ng tournament, ang Barangay UP campus squad na nag-uwi ng titulo sa prestihiyosong paligsahang ito na nagtatampok sa mga pinakamahusay na atleta sa Quezon City.
Kasama ni Magpily sa nagwaging koponan sina Cyrus Vladimir Francisco, Mark Nuella, at ang rookie na si Daniel Tagufa.
Ang Barangay UP campus, District 4 ay nagtapos sa rapid competition na may 9 na match points, 15.5 game points upang masungkit ang titulo at umuwi ng tropeo ng kampeonato kasama ang pangunahing gantimpalang P50,000, na suportado ni Quezon City Vice Mayor Gian Sotto.
Ang pinakamalapit na kalaban ng Barangay UP campus, District 4 squad ay ang Barangay Holy Spirit, District 2, na nagtapos sa tournament na may 9 na match points, 13.5 game points.
Pangatlo ang Barangay Bagong Pag-Asa, District 1, na may 4 na match points, 9.5 game points, habang ang Barangay Sta. Lucia, District 5 at Barangay Matandang Balara, District 3, ay nagtapos sa ikaapat at ikalimang puwesto, ayon sa pagkakasunod, na may parehong 4 na match points, 8 game points.
Pang-anim ang Barangay Baesa, District 6 na may 5.5 game points.
Nagwagi ang Barangay UP campus squad laban sa Barangay Matandang Balara (Round 1), Barangay Bagong Pag-Asa (Round 2), Barangay Sta. Lucia (Round 3), at Barangay Bagong Pag-Asa (Round 4). Hati ang puntos ng Barangay UP campus squad at ng Barangay Holy Spirit sa ikalima at huling round.
“Ang pambihirang tagumpay na ito ay patunay sa matagal nang dedikasyon ng UP sa pagpapayabong ng kahusayan sa larangan ng larong chess,” sabi ni University of the Philippines coach FIDE Master Leonardo Carlos.(Marlon Bernardino)
Related Posts
