Isang panukalang batas ang inihain sa Senado upang magtatag ng bagong pambansang ahensiya para sa malikhaing sektor at itaguyod ang pandaigdigang mobilidad ng mga Filipino creatives, na inihain ni Sen. Bam Aquino sa tulong ng P-pop Kings na SB19.
Kamakailan lamang ngayong linggo kinilala sa Senado ang SB19 dahil sa kanilang makasaysayang pagtatanghal sa Lollapalooza ngayong taon at sa kanilang ambag sa pag-unlad ng industriya ng malikhaing sining sa Pilipinas.
Ang pagkilalang ito ay bunga ng paghahain at pag-sponsor ni Aquino ng Senate Resolution 545, kung saan pormal niyang tinanggap ang boy band sa Mataas na Kapulungan. Ang interaksiyon ay nagbukas ng panibagong hakbang pasulong.
Noong Setyembre 30, Miyerkules, inihain ni Aquino ang Senate Bill 2517 na pinamagatang “An Act Promoting the Global Mobility of Creative Workers, Goods, and Services, Establishing the Philippine Agency for the Creative Economy (PACE), and Appropriating Funds Therefor” o mas kilala bilang PACE Act.
“Kayang makipagsabayan ng Filipino creatives sa global stage,” ani Aquino sa Facebook. “Ang kailangan lamang ay tamang suporta at oportunidad upang maipamalas ang kanilang galing.”
Binanggit ng senador ang kanyang mga pag-uusap kina Pablo at Josh ng SB19 na nagbigay-linaw sa mga hamon na kinakaharap ng mga artista kapag nagtatanghal o nagdadala ng kanilang musika sa ibang bansa—mula sa pagproseso ng visa at travel documents hanggang sa kakulangan ng suporta para sa mga internasyonal na aktibidad.
Ang mga isyung ito ay tinukoy din sa awitin ng SB19 na “Visa”, na binanggit ni Aquino sa kanyang paliwanag na kalakip ng Senate Bill 2517.