Pinayuhan ng Bangko Sentral ng Pilipinas (BSP) ang publiko na agad i-report sa kanilang bangko o e-wallet provider ang maling fund transfer o digital transaction, dahil mas mataas ang tsansang ma-trace at mabawi ang pera kapag maagap ang aksyon.
Ayon sa BSP, ang mga reklamo kaugnay ng erroneous transfer o umano’y unauthorized transaction ay dapat ihain sa originating financial institution (OFI), o sa bangko o e-wallet na pinagmulan ng ipinadalang pera.
Para sa maling padala ng account holder sa hindi sinasadyang recipient, sinabi ng BSP na dapat nakasaad sa report ang pangalan ng nagpadala, contact number, pinagmulang account, detalye ng payee account, halaga ng transaksyon, at petsa at oras ng transfer.
Kung magkaiba ang OFI at ang receiving financial institution (RFI), dapat ipagbigay-alam ito ng OFI sa RFI. Ayon sa BSP, ang dalawang institusyon ay “should make reasonable efforts to recover the sum sent in error in accordance with existing regulations and industry conventions.”
Dagdag pa ng central bank, sa mga usapin ng transfer dispute o umano’y unauthorized transaction, ang OFI ang “primarily responsible for providing assistance and redress to its clients.”
Habang iniimbestigahan ang kaso, sinabi ng BSP na dapat munang suspendihin ng OFI at RFI ang paniningil ng interes, fees, o charges kung naaangkop, at panatilihing naka-hold ang pinagtatalunang pondo kung hindi pa ito nagagalaw. Maaari rin umanong magbigay ang mga financial institution ng “reasonable accommodations” gaya ng non-withdrawable provisional credit o pansamantalang hold sa disputed amount.
Ayon sa BSP, dapat pormal na ipaalam sa kliyente ang resulta ng imbestigasyon sa loob ng tatlong banking days matapos itong makumpleto.
Samantala, sinabi ng GCash na dapat suriing mabuti ng mga user ang detalye ng transaksyon bago magpadala ng pera dahil real-time ang pagproseso nito.
Ayon dito, maaari lamang ma-reverse ang transaction kung inactive o hindi ginagamit ang account. Kung maling tao ang napadalhan, pinapayuhan ang user na direktang kontakin ang recipient, habang ang mga nagpadala sa luma o inactive na numero ay maaaring humingi ng tulong sa app, kung saan ang refund ay idinadaan sa “best-effort” basis.
Naglabas din ng kaparehong paalala ang Maya at sinabing kailangang tiyakin muna ng user na tama at valid ang account ng recipient bago kumpirmahin ang transfer dahil “there is no way to reverse transactions that go to incorrect accounts.”
Ayon dito, dapat ding direktang kausapin ang recipient, habang ang perang naipadala sa non-existent account ay karaniwang awtomatikong naibabalik sa loob ng dalawang banking days.
Related Posts
