Photo: MGA KAMPEON NG PUSO!
Ipinahayag nina NPC National Paralympic Committee President Mike Barredo at Coach Gerson Bautista ang buong tiwala sa mga tsansa ng delegasyon ng Pilipinas sa darating na Asian Para Games sa Nagoya, Japan, na gaganapin mula Oktubre 18 hanggang 24, ayon sa kanilang pahayag sa kanilang pagdalo sa lingguhang PSA Forum sa PSC Media Room, Rizal Memorial Sports Complex. (REY NILLAMA)
———————————–
Sa kabila ng mga malalaking pagsubok, buong-tapang at buong-pusong iwagayway ng mga mandirigmang para-athletes ng bansa ang bandila ng Pilipinas sa kanilang pagtapak sa ika-5 Asian Para Games sa Aichi-Nagoya, Japan.
Sa ginanap na Philippine Sportswriters Association (PSA) Forum, nagbigay ng nakaka-insipirong panawagan si National Paralympic Committee (NPC) President Mike Barredo. Binigyang-diin niya na nananatiling matatag at hindi natitinag ang laban ng bansa sa kabila ng mga pagbabago sa kompetisyon.
Ang darating na paligsahan, na gaganapin mula Oktubre 18 hanggang 24, ay magiging isang mabigat na pagsubok para sa delegasyon ng Pilipinas. Ito ay lalo pang tumindi dahil sa hindi inaasahang pagtanggal sa tradisyonal na pinagkukunan ng ginto ng bansa tulad ng chess. Sa harap ng mga mamamahayag sa palakasan, kinilala ni Barredo ang mga naging hakbang ng mga opisyal ng sports na muling nagtakda ng makatotohanang layunin na apat hanggang limang gintong medalya, habang hinihimok ang buong koponan na samantalahin ang bawat pagkakataon.
Ipinahayag din ni National Coach Gerson Bautista ang kahalagahan ng puspusang pisikal at mental na paghahanda ng pambansang koponan upang mapaliit ang agwat sa pagitan nila at ng mga higanteng bansa sa Asya. Aniya, mas pinaigting pa ang kanilang mga ehersisyo na nakatutok sa pagpapatalas ng teknik, pagpapalakas ng stamina, at pagpapatatag ng kaisipan ng mga atleta laban sa mga panlabas na hamon, kabilang na ang mga paalala sa kalusugan bago ang biyahe.
Iisa ang naging mensahe nina Barredo at Bautista: na ang bawat miyembro ng 69-kataong pambansang delegasyon ay hindi lamang lumalaban para sa medalya—dala rin nila ang hindi natitinag na puso ng manggagawang Pilipino na patuloy na lumalaban sa kabila ng mga pagsubok.
Habang naghahandang lumipad patungong Nagoya ang pambansang delegasyon para sa maringal na paligsahan, nanawagan ang pamunuan ng sports sa buong bansa na suportahan ang ating mga para-athletes. Ang kanilang tapang, disiplina, at wagas na dedikasyon ay patuloy na nagbibigay-inspirasyon sa milyun-milyong Pilipino sa tahanan. (REY NILLAMA)