Nakumpleto ng “A Perfect Marriage,” ang pelikulang dramang pinagbibidahan nina Kim Chiu at Paulo Avelino, ang tinatawag na “Magic 8” ng Metro Manila Film Festival (MMFF), o ang opisyal na walong pelikulang maglalaban sa ika-52 edisyon ng festival.
Inilunsad ang ikalawang batch ng mga kalahok na pelikula sa isang seremonyang ginanap noong Lunes sa Shangri-La Plaza Mall sa Mandaluyong, na pinangunahan nina Kaladkaren at Enchong Dee.
Bukod sa “A Perfect Marriage,” kabilang din sa mga napiling finalista ang:
“Los Salvajes Bravos” na pinagbibidahan nina Ruru Madrid at Romnick Sarmenta;
“Little Hope” na pinagbibidahan nina Yassi Pressman at Pepe Herrera; at
“Seeds of Peace” na pinagbibidahan ni Zaijian Jaranilla.
Ang mga pelikulang ito ang bumubuo sa ikalawang batch ng mga kalahok sa festival, na magbubukas sa mga sinehan sa Disyembre 25.
Nauna nang inanunsyo noong Hulyo ang unang batch ng mga kalahok na pelikula:
“2nd Miracle in Cell No. 7” nina Aga Muhlach at Jodi Sta. Maria;
“Amir” nina Dennis Trillo at Glaiza de Castro;
“Haunted Carnival” nina Julia Barretto at James Reid; at
“The Greatest Showdown” nina Vice Ganda at Vic Sotto.
Samantala, sinabi ni MMFF spokesperson Noel Ferrer na hindi lalagpas sa ₱299 bawat tao ang presyo ng tiket para sa mga pelikulang kalahok sa buong panahon ng festival. Nauna itong inanunsyo ni Metro Manila Development Council Chairman Don Artes matapos ang pakikipagpulong sa Cinema Exhibitors Association of the Philippines, ang samahan ng mga may-ari at operator ng mga sinehan sa bansa.