Hindi umano ipipilit ng Department of Education (DepEd) sa mga private school na ipatupad ang trimester sa basic education sa unang taong implementasyon nito.
Ito ang kinumpirma ng mga kinatawan ng Catholic Educational Association of the Philippines (CEAP) at Coordinating Council of Private Educational Associations (COCOPEA) sa pagdinig ng House Committee on Basic Education sa trimester program ng DepEd.
“We understand Mr. Chair that this is mandatory in public schools but for private school its optional atleast for this (school) year. So this observation period actually,” ani Atty. John Jacome, secretary general ng COCOPEA.
Ganito din ang pahayag ni CEAP executive director Narcy Dionisio na inamin ng hiniling ng mga ito sa DepEd na bigyan sila ng isang taong transition period mula sa apat na semester tungo sa 3 semester na lamang.
Kinumpirma naman ito ni DepEd Assistant Secretary Janir Datukan na puwedeng hindi munang ipatupad sa mga private schools ang trimester program ng ahensya na sisimulang ipatupad ngayong school years, subalit isang taon lamang ang ibinigay sa mga ito at kailangang sumunod sa susunod na taon.
Samantala, nagrereklamo ang mga miyembro ng Alliance of Concerned Teachers na kinakatawan ni Rep. Antonio Tinio sa Kamara dahil hindi umano kinonsulta ng DepEd ang mga public school teachers sa nasabing programa.
Bagama’t nagpatawag na konsultasyon ang DepEd noong Pebrero 28, tanging ang mga matataas na opisyales at mga organisasyon ng mga public schools lamang ang kinonsulta at hindi ang mga frontliners na mga guro.
Sa ilalim ng trimester program, hanggang third grading na lamang ang eksaminasyon ng mga estudyante imbes na 4th grading sa kasalukuyan.
Gayunpaman, mananatiling 220 days ang pasok ng mga estudyante at hindi babaguhin ang curriculum.
