OPISYAL na inilunsad ang tool kamakailan sa Mall of Asia Music Hall, mabilis na para sa mga Pilipino ang pagpili ng tamang karera at programa sa pagsasanay sa tulong ng bagong career profiling tool na binuo ng Technical Education and Skills Development Authority (TESDA).
Layunin nitong itugma ang mga interes, kakayahan, at kasanayan ng mga mag-aaral sa angkop na mga landas sa technical-vocational education and training (TVET).
Tinawag na TESDA Skills COMPASS (Career Orientation and Matching for Professional Advancement and Support System).
Sinusuportahan ng Skills COMPASS ang direktiba ni Pangulong Ferdinand R. Marcos Jr. na tugunan ang jobs-skills mismatch sa bansa sa pamamagitan ng pagtitiyak na mas naaayon ang mga programa sa edukasyon at pagsasanay sa mga pangangailangan ng labor market.
Binuo sa ilalim ng pamumuno ni Secretary Kiko Benitez, pinalalakas ng inisyatibang ito ang mga hakbang ng TESDA upang matulungan ang mga Pilipino na makagawa ng mas may sapat na kaalaman at batayang desisyon hinggil sa kanilang pagpapaunlad ng kasanayan at karera.
“The Skills COMPASS measures your skills, interests, and potential, and aligns them with the needs of today’s job market,” ayon kay Secretary Benitez. “Everybody wins with the Skills COMPASS kasi nagbibigay siya ng direksyon. The job aspirants get career guidance, while the industry gets in a better position to find strong employee matches for their job openings.”
Nagbibigay ang Skills COMPASS sa mga mag-aaral ng komprehensibong profile ng kanilang mga interes, kakayahan, at kasanayan na maaaring maging batayan sa career guidance at pagpili ng mga angkop na TVET program at qualification.
Tinatasa ng instrumento ang mahahalagang larangang may kaugnayan sa edukasyon, pagsasanay, at trabaho, kabilang ang mga career interest at employability skills, socio-emotional skills, 21st-century skills, trade skills, at foundational skills. Nagbibigay ang mga ito ng mas malawak na larawan ng kakayahan ng isang indibidwal at mga larangang maaari pang paunlarin, higit pa sa nakikitang resulta ng akademikong pagganap.
Matapos makumpleto ang assessment, tutulungan ng isang TESDA guidance counselor o itinalagang career advocate ang mag-aaral na maunawaan ang mga resulta at tukuyin ang mga TVET qualification o training program na maaaring angkop batay sa kanyang profile.
Para sa mga nais sumailalim sa pagsasanay, nagbibigay ito ng pagkakataong mapag-isipan muna ang kanilang mga opsyon sa karera bago magpasya sa isang partikular na training program. Makakatulong ang assessment upang matukoy nila ang kanilang mga kalakasan, matukoy ang mga larangang kailangan pang paunlarin, at tuklasin ang mga career path na naaayon sa kanilang mga interes at kakayahan.
Sa antas ng workforce, inaasahan ng TESDA na makatutulong ang Skills COMPASS sa pagbawas ng jobs-skills mismatch sa pamamagitan ng pagpapalakas ng ugnayan sa pagitan ng indibidwal na kakayahan, pagpili ng pagsasanay, at mga oportunidad sa trabaho.
Sinusuportahan ng inisyatiba ang patuloy na pagsisikap ng TESDA na gawing mas tumutugon ang TVET sa pagtiyak na ang skills training ay humahantong sa mas magandang oportunidad sa trabaho, paglago ng karera, at mas maayos na kabuhayan.(Gina Garcia)
