P2B iligal na yosi, nasabat sa Q1 ng 2026

Nakakumpiska ang Philippine National Police (PNP) ng mahigit P2 bilyong halaga ng smuggled cigarettes sa buong bansa mula Enero 1 hanggang Marso 29, 2026.
Ayon sa PNP, nagsagawa sila ng 3,153 operasyon sa nasabing panahon na nagresulta sa pagkakaaresto ng 1,187 indibidwal. Nakumpiska rin ang 246,085 pakete, 484,064 reams, at 9,961 master cases ng sigarilyo, pati na ang ilang manufacturing equipment.
Nanguna sa pinakamataas na halaga ng nakumpiskang kontrabando ang Criminal Investigation and Detection Group (CIDG) na umabot sa mahigit P690 milyon. Sinundan ito ng Police Regional Office 9 sa Zamboanga City na may higit P147 milyon, at Police Regional Office 4A sa Calabarzon na may higit P116 milyon.
Ayon kay PNP chief Jose Melencio Nartatez Jr., malaki ang epekto ng mga nasabat na kontrabando sa ekonomiya at patunay ito ng aktibong operasyon ng mga pulis sa field.
“These results show that our personnel on the ground are doing their job and doing it well,” aniya.
“Hindi lang yung nahuhuli sa operasyon kundi pati yung nasa likod nito, hahabulin namin. Mula pinanggagalingan hanggang sa distribusyon, titiyakin naming mapapanagot ang mga sangkot,” dagdag pa niya.