Juvenile council nanawagan ng rehab, mental health services para sa young offenders

Inihayag ng Juvenile Justice and Welfare Council (JJWC) ang hindi nito pagsang-ayon sa panukalang ibaba ang minimum age ng criminal liability kasunod ng madugong pamamaril sa isang eskuwelahan sa Tacloban City.
Sinabi ni JJWC Executive Director Tricia Clare Oco na hindi ang pagbabago ng batas ang pangunahing solusyon upang mapigilan ang karahasang kinasasangkutan ng mga menor de edad.
“If you want to deter violence na kino-commit ng mga bata, ang tutukan mo talaga ‘yung drivers of violence and it’s not the law,” ani Oco.
Ayon sa kanya, dapat tutukan ang kapaligiran ng mga bata, kanilang pagpapalaki, at ang pagkakalantad sa mararahas na content sa social media.
“‘Yung environment nila, yung kinalakihan nila, yung access nila sa social media na nino-normalize yung violence,” dagdag pa ni Oco.
Binanggit din ni Oco ang insidente ng Columbine High School massacre sa United noong 1999 upang ipakita na hindi garantiya ang mahigpit na batas upang maiwasan ang mga ganitong krimen.
“Very strict ‘yung batas nila. Mayroon silang death penalty that time at kapag between 13 to 17 [years old]ka nag-commit ka ng serious crime, pwede kang i-try as adult,” aniya.
“Ilalagay ka na sa kulungan, hindi na itatago ‘yung mukha mo tulad ng ginagawa sa mga bata. But it didn’t deter ‘yung two youth na mag-shoot sa school.”
Ang ginawa naman umano ng dalawang estudyante sa naturang massacre ay pinatay nila ang kanilang sarili matapos barilin ang 13 indibidwal, kung saan ipinupuntong hindi magiging sagot sa pagpigil sa pag-atake ang mga striktong criminal law.
Kaya sa halip aniya na pababain ang edad ng criminal liability, iginiit ni Oco na mas mahalagang palakasin ang rehabilitasyon, mental health services, at mga programang makatutulong sa pag-iwas sa karahasan.