Tumaas ang presyo ng fuel sa ikalimang sunod na linggo dahil sa digmaan sa Middle East, na lalong nagpapahirap sa mga transport worker at nagdudulot ng tanong tungkol sa tugon ng gobyerno.
Ayon sa mga public utility vehicle drivers, malaki ang epekto ng patuloy na pagtaas sa kanilang kita araw-araw.
Ayon sa transport groups, kabilang si Manibela chair Mar Valbuena, hindi ramdam ng mga drayber ang epekto ng mga hakbang ng gobyerno para sa oil supply security.
“Kung puro pagtaas din ang petrolyo, ano ang silbi noong pagdaan natin doon sa Strait of Hormuz?” aniya.
Dagdag pa niya, apektado rin ang mga manggagawa, magsasaka, at mangingisda dahil sa patuloy na taas-presyo, at tila hindi rin naging epektibo ang inaasahang buffer supply.
Paliwanag naman ni Energy Secretary Sharon Garin, ang pagtiyak sa access sa Strait of Hormuz ay hindi agad nangangahulugan ng pagbaba ng presyo ng langis, kundi para sa tuloy-tuloy na supply at stability ng ekonomiya sa gitna ng krisis.
Sinabi rin ng Presidential Communications Office (PCO) na dapat umasa ang publiko sa verified information at iwasan ang disinformation tungkol sa isyu ng enerhiya.
Mula Marso 10, umabot na sa P31 kada litro ang itinaas ng gasolina, P70.70 sa diesel, at P67.75 sa kerosene.
Habang patuloy ang pagtaas ng presyo, mas lalong bumibigat ang gastusin ng mga drayber at commuters, na wala pang agarang kaginhawaan sa ngayon.
Related Posts
