WALANG nakikita si coach Jong Uichico na bentahe ng kanyang NLEX laban sa Rain or Shine sa rambulan sa quarterfinals ng PBA Season 49 Philippine Cup na sisiklab ngayong Miyerkoles, June 18, sa PhilSports Arena.
No. 2 pagkatapos ng eliminations ang Road Warriors na pamumunuan pa rin ni Robert Bolick, may twice-to-beat advantage laban sa No. 7 Elasto Painters.
“Hindi pa kami that seasoned, unlike Rain or Shine,” punto ni Uichico sa bisperas ng bakbakan. “Though they are young, they have some young players, they’re already seasoned.”
Marami ngang pinahirapan sa elimination round sina Adrian Nocum, Anton Asistio, Gian Mamuyac, Jhonard Clarito, Santi Santillan at Caelan Tiongson.
Nawalan lang ng isa pang facilitator at mainam na defender si coach Yeng Guiao dahil out na sa season si rookie Felix Lemetti dahil sa left arm injury.
Nakarating pa ang Painters hanggang semis ng dalawang naunang conference ng season, ang Governors at Commissioner’s Cups. Hindi naman pamilyar sina Bolick at ang Road Warriors sa posisyon nila ngayon na may bonus pa.
“We are new to this situation,” pag-amin ni Uichico. “We’ve been always either looking up at the standings, or not even given the chance to look at the standings.”
Top scoring team ang RoS, malakihang magsalansan ng puntos, mahilig tumakbo, pisikal sa depensa – ayon sa NLEX mentor ay wala raw butas sa opensa. Tinalo nina Bolick at ng Road Warriors ang Painters 109-95 sa elims noong April 12 pero not counted na raw ‘yun.
Kagandahan sa NLEX, makakabalik na mula injuries sina Javee Mocon, Dominic Fajardo at Anthony Semerad, kumpleto ang support cast ni Bolick kasama sina Kevin Alas, Brandon Ramirez, JB Bahio, Xyrus Torres at Jonnel Policarpio.
“From our last game, naka-recover na naman sila. Lahat naman sila okay na, kumpleto naman kami,” balita ni coach Jong.
