Lebel ng tubig sa Angat dam, patuloy na bumababa

Patuloy na bumababa ang lebel ng tubig sa Angat Dam habang kasagsagan ng mainit at tuyong panahon, ayon sa datos ng PAGASA nitong Huwebes.
Bandang 8 a.m., nasa 181.35 metro ang water level ng dam, bahagyang mas mataas lamang sa minimum operating level na 180 metro kung saan nililimitahan na ang suplay para sa irigasyon upang unahin ang domestic water consumption.
Nagpapatupad naman ng water rationing at service interruptions kapag umabot sa critical low level na 160 metro ang tubig sa dam.
Ang Angat Dam ang nagsusuplay ng 90 porsyento ng pangangailangan sa tubig ng Metro Manila.
Mula Abril 30, bumaba na ng kabuuang 2.77 metro ang lebel ng tubig sa reservoir o katumbas ng average na 0.40 metro kada araw.
Mas maliit naman ang ibinaba ng lebel ng tubig sa ibang pangunahing dam sa Luzon. Bumaba ng 1.17 metro ang San Roque Dam at 1.11 metro naman sa Pantabangan Dam.
Samantala, tumaas naman ng 0.16 metro ang tubig sa Magat Dam sa nakalipas na pitong araw.
Ayon sa state hydrologists, posibleng bumaba sa 181.42 metro ang water level ng Angat Dam sa katapusan ng Mayo at 179.59 metro naman sa pagtatapos ng Hunyo.
Umaasa ang PAGASA na makatutulong ang mga thunderstorm sa Angat watershed sa ikalawang kalahati ng Mayo upang mapabagal ang pagbaba ng tubig habang papalapit ang tag-ulan.
Inaasahan din ang mas maraming pag-ulan kapag nagsimula na ang rainy season at habang lumalakas ang developing El Niño na maaaring magpalakas sa southwest monsoon.
Samantala, patuloy pa rin ang mainit at maalinsangang panahon sa maraming bahagi ng bansa. Naitala sa Tuguegarao City ang pinakamataas na temperatura ngayong season na 39.5°C noong Mayo 6.
Ayon sa PAGASA, maaari pang umabot hanggang 40.8°C ang temperatura sa Northern Luzon at 40.0°C sa Central Luzon ngayong Mayo.