Isko sagot kita ng tsuper: Librang sakay sa Maynila!

Inanunsiyo ni Manila City Mayor Francisco “Isko Moreno” Domagoso nitong Biyernes, Marso 27, na sasagutin ng lokal na pamahalaan ng Maynila ang kita ng mga tsuper ng jeep upang makapagbigay sila ng libreng sakay sa mga commuter, bilang bahagi ng pagpapatupad ng Executive Order No. 14, serye ng 2026.
Ipinahayag ang programa sa kanyang “Talk to the People” address matapos ang pagpupulong kasama ang mga pangulo ng 22 Jeepney Operators and Drivers Associations (JODA). Layon nitong isakatuparan ang Section 5 ng EO 14, na nagtatadhana ng tulong pang-ekonomiya para sa sektor ng transportasyon sa gitna ng patuloy na pagtaas ng presyo ng langis.
Sa ilalim ng sistema, sasagutin ng Pamahalaang Lungsod ng Maynila ang pang-araw-araw na operasyon ng mga kasaling jeepney, upang matiyak na may garantisadong kita ang mga tsuper at operator kahit walang pamasahe ang sinisingil sa mga pasahero.
Ayon kay Domagoso, tatanggap ang mga tsuper ng humigit-kumulang P3,000 kada araw depende sa uri ng unit, upang tugunan ang malaking ibinaba ng kanilang kita dahil sa sunod-sunod na pagtaas ng presyo ng krudo.
“Hihiramin ko ’yung mga jeep at driver. Garantisadong bayad araw-araw. May kita ang operator, may kita ang driver. Tiyak na kita, kasiguruhan. May kita ang gasolinahan at mga nagnenegosyo sa Maynila, at higit sa lahat, walang kailangang bayaran ang ating mga mananakay kapag ang jeep na sasakyan nila ay kasapi ng programa ng Lungsod ng Maynila,” ayon kay Domagoso.
Tinatayang mahigit 1,400 jeepney ang lalahok sa programa, na sasakop sa mga ruta sa Maynila at karatig-lugar. Estima ng alkalde na aabot sa 100,000 pasahero kada araw ang maaaring mapagsilbihan nito.
Ayon kay Domagoso, nabuo ang inisyatiba sa loob ng 48 oras bilang agarang tugon sa epekto ng pandaigdigang krisis sa langis, na nagbaba sa kita ng mga tsuper sa pagitan lamang ng P200 hanggang P500 kada araw.