KORTE Suprema ang dapat magpasya sa usapin ng voting threshold sa impeachment trial, at dapat ginawa na ito bago pa man naipasa ng Impeachment Court ang rules nito, giit ni Senator-judge Alan Peter Cayetano nitong Miyerkules.
Ipinahayag ito ng senador noong September 23, sa gitna ng nagpapatuloy na talakayan ng Impeachment Court hinggil sa bilang ng botong kailangan para mahatulan si Vice President Sara Duterte.
Dinidinig ng Impeachment Court ang apela ni Senator-judge Erwin Tulfo na muling pag-aralan ang naunang desisyon ni Presiding Officer Francis “Chiz” Escudero na 16 ang kailangang boto mula sa 24 na senador.
Babala ni Cayetano, kung babaguhin ang threshold na ito sa gitna ng trial, maaaring maging grounds ito para iakyat ng alinmang panig sa Korte Suprema ang magiging hatol ng Impeachment Court kay Duterte, at sa huli ay mabalewala ang buong paglilitis kung lumabas na may “grave abuse of discretion” ang Impeachment Court.
Hinimok niya ang Impeachment Court na huwag nang pagbotohan pa ang isyu dahil Korte Suprema ang may hurisdiksyon pagdating sa interpretasyon ng voting threshold na nakasaad sa Konstitusyon.
“On the record, I would prefer – and I would insist – that if there is a question on the threshold, the question be brought before the Supreme Court,” wika ni Cayetano.
Paliwanag niya, kahit may hurisdiksyon ang Impeachment Court sa sarili nitong rules, “it may disappear when there is grave abuse of discretion that amounts to lack or excess of jurisdiction” pagdating sa ilang partikular na usapin.
At kung may kapangyarihan man ang Impeachment Court na baguhin ang kinakailangang bilang ng boto, dagdag pa ni Cayetano, dapat aniya ay pinagpasiyahan iyon sa simula pa lang ng paglilitis.
“Timing is essential,” giit niya. “If we did it before we passed the rules of the Senate, all parties would have been informed and all parties would have had the chance to go to the Supreme Court.”
“To discuss it in the middle of the trial, just before the prosecution is ending and just before the defense will be presenting their evidence, is not only inconvenient or uncomfortable, but I use the word ‘mistrial,’” dagdag niya.
Binanggit rin ni Cayetano ang pulitikal na kontekstong bumabalot sa isyu ng pagpapababa sa voting threshold.
“There are real politics happening here. It’s not an accident na hindi panay opposition ang puro wala na dito,” aniya.
“Inside the court, nararamdaman natin y’ung fairness. But the reality is, this court does not exist in a vacuum. May nangyayari sa labas… Hindi dapat gumawa ng mga akusasyon dito, pero hindi rin pwedeng bulag-bulagan dito na walang nangyayari sa ating bansa,” dugtong niya.(Nino Aclan)
11.