Pormal nang nagbitiw si Reservist Brig. Gen. Michael Romero sa kanyang tungkulin bilang Wing Commander ng Tactical Operations Wing Reserve Northern Luzon at nagretiro na sa AFP Reserve Force.
Batay sa letter of relinquishment of duties and retirement na ipinadala sa Chief of Staff ng Armed Forces of the Philippines (AFP), epektibo ang pagreretiro ni Romero noong Agosto 19, 2026.
“It has been a profound privilege and honor to serve our country alongside the dedicated men and women of the Armed Forces of the Philippines,” sabi ni Romero. “I am deeply grateful for the trust, friendship, camaraderie and opportunities afforded to me through my service.”
Bilang reservist, lumahok si Romero sa mahigit 60 boluntaryong aktibidad na kinabibilangan ng civil-military operations, humanitarian assistance, at disaster response. Kabilang dito ang food assistance, serbisyong medikal at dental, educational support, at tulong sa mga komunidad at pamilyang nangangailangan, na umabot sa mahigit 20,000 Pilipino sa iba’t ibang komunidad sa Pag-asa Island sa West Philippine Sea, Mavulis at Itbayat sa Batanes, gayundin sa Basilan, Tawi-Tawi, Jolo, Dinagat Islands, Zamboanga, North Cotabato, Bulacan, at Pampanga.
“Those experiences strengthened my belief that genuine service is ultimately measured not by rank or position, but by what we are able to do for our people and our country,” sabi ni Romero, na dating kinatawan sa Kongreso ng 1Pacman party-list.
Si Romero ay naging chairperson din ng Association of Reservists and Reservist Administrators of the Philippines (ARRAPI), kung saan isinulong niya ang mas malawak na partisipasyon ng mga citizen-soldier sa national defense, humanitarian assistance, at disaster response sa ilalim ng Philippine Total Defense framework.
Bukod sa pagpapalawak ng membership nito, inorganisa ng ARRAPI sa ilalim ng kanyang pamumuno ang 2025 AFP National Reservist Convention sa One Ayala Mall sa Makati City, na pinagsama-sama ang mahigit 4,500 reservists na dumalo onsite at tinatayang 48,000 kalahok online mula sa Luzon, Visayas, at Mindanao.
“My service in uniform may come to an end,” dagdag pa ni Romero. “My duty to our people, our sovereignty, our flag, and our country will endure.”
Related Posts
