Sinabi ni Department of Education Secretary Sonny Angara na mas maraming oportunidad ang bubuksan para sa mga batang atletang Pilipino sa Palarong Pambansa 2026 dahil sa pagdagdag ng bagong sports at mas inklusibong patakaran.
Gaganapin ang 66th Palarong Pambansa mula Mayo 24 hanggang 31 sa Agusan del Sur, kung saan inaasahang darating ang humigit-kumulang 11,000 student-athletes mula sa iba’t ibang panig ng bansa.
Ayon kay Angara, handa na ang probinsya para sa pambansang palaro.
“Palarong Pambansa continues to evolve alongside the aspirations of our learners. This year, we are opening more spaces for participation, recognizing more forms of athletic excellence, and creating a competition environment that is fairer and more inclusive for every student-athlete,” ani Angara.
Kabilang sa mga bagong regular events ang weightlifting, football para sa secondary girls, at futsal para sa elementary girls.
Magkakaroon din ng demonstration sports tulad ng karate, kickboxing, at soft tennis, habang exhibition events naman ang muay thai at ilang Paragames events gaya ng sitting volleyball at table tennis.
Mas pinalawak din ang partisipasyon sa pagbabalik ng Negros Island Region bilang hiwalay na delegasyon. Makikilahok din bilang independent delegations ang Philippine Schools Overseas at National Academy of Sports.
Magpapatupad din ang Department of Education ng bagong policies para sa mas patas na kompetisyon sa ilang sports events.
“We believe that through a fairer and more inclusive Palarong Pambansa this year, every young athlete will be given greater opportunities to fully showcase their talent, potential, and excellence,” dagdag ni Angara.
Related Posts
