PH vs Tajikistan sa Asian Cup qualifier

Pinangalanan ng Pilipinas nitong Martes ang bubuo sa kanilang squad para sa nalalapit nitong laban sa AFC Asian Cup qualifiers laban sa Tajikistan.
Iho-host ng Pilipinas ang Tajikistan sa isang Group A showdown sa New Clark City Stadium sa Hunyo 10, kung saan susubukan nilang buuin ang 4-1 na tagumpay laban sa Maldives noong Marso 25.
Kabilang sa mga kilalang pangalan sa squad ay ang beterano ng Bundesliga na si Gerrit Holtmann, na inaasahang laruin ang kanyang unang laban sa sariling lupa pagkatapos gawin ang kanyang debut para sa Pilipinas noong 2022.
Kasama rin sa lineup si Randy Schneider, na nagbida sa paghagupit ng mga Pinoy sa Maldives, kasama ang young star na si Sandro Reyes. Samantala, ang 23-anyos na si Andre Leipold ay tinawag sa unang pagkakataon.
“Nakarating ang Tajikistan sa quarterfinals ng huling edisyon ng Asian Cup. Sila ang top seed sa aming grupo para sa isang dahilan,” sabi ni team manager Freddy Gonzalez.
“Pero kung gusto naming ma-achieve yung goal namin na qualification, ito yung mga klase ng laro na kailangan naming tikman,” dagdag nito.
“Naniniwala kami sa kalidad na mayroon kami sa aming koponan at kasama ang mga tagasuporta sa likod namin, mayroon kaming pagkakataon na makamit ang isang bagay na espesyal sa bahay.”
Nalusutan ng Tajikistan ang Timor-Leste, 1-0, sa kanilang laban noong Marso 25 para tumabla sa Pilipinas sa tuktok ng Group A.
Tanging ang mga nanalo sa grupo sa ikatlong round ng kwalipikasyon ang mag-aangkin ng mga puwesto sa 2027 AFC Asian Cup.