Arestado ng mga awtoridad sa San Andres, Quezon noong Huwebes, Mayo 21, ang limang mangingisda matapos umanong mahulihan ng sari-saring isda na pinaniniwalaang nahuli sa pamamagitan ng illegal na dynamite fishing.
Ayon sa ulat ng Quezon police, nakatanggap ang San Andres Municipal Police Station ng impormasyon bandang alas-10 ng umaga na ang isang bangkang pangisda na may markang “JOAN” ay nagbaba ng dalawang Styrofoam container sa Barangay Talisay na naglalaman ng iba’t ibang uri ng isda na hinihinalang mula sa blast fishing.
Agad na nakipag-ugnayan ang pulisya sa Municipal Agriculture Office at nagtungo sa lugar upang beripikahin ang ulat.
Ayon sa isang government fish examiner, ang mga nakumpiskang isda ay kumpirmadong maaaring nahuli gamit ang dynamite fishing, na isang ilegal at mapaminsalang paraan ng pangingisda.
Inaresto ang mga tripulante ng bangka na kinilala lamang sa mga alyas na “Alvin,” “Hadjie,” “Mateo,” “Nonilo,” at “Guilbert,” na pawang residente ng San Pascual, Masbate.
Kasalukuyang nasa kustodiya ng pulisya ang mga suspek at haharap sa kaukulang kaso dahil sa paglabag sa mga batas pangisdaan at pangkalikasan.
Related Posts
