Umabot sa 1,279 kahon ng hinihinalang counterfeit o pekeng produkto, na may tinatayang halagang ₱5,949,200.00, ang isinuko matapos ang isinagawang post-audit at ocular inspection sa isang grocery products trading establishment sa Barangay Gen. T. De Leon, Valenzuela City, bandang 10:30 ng umaga noong Agosto 25, 2026.
Isinagawa ang inspeksyon ng Business Permit and Licensing Office (BPLO) ng Pamahalaang Lungsod ng Valenzuela, kasama ang mga kinatawan ng isang food manufacturing company, kaugnay ng kanilang reklamong umano’y pamemeke ng kanilang produkto. Naroon din ang mga barangay tanod ng Barangay Gen. T. De Leon.
Sa isinagawang inspeksyon, natukoy ang malaking bilang ng mga produktong pinaniniwalaang peke o counterfeit.
Ang mga naturang produkto ay isinuko at kinumpiska ng kinatawan ng kumpanyang nagreklamo at nakatakdang sumailalim sa kaukulang proseso para sa destruction o disposal, alinsunod sa mga umiiral na patakaran at pamamaraan.
Samantala, nagbigay ng area security ang mga tauhan ng Valenzuela City Police Station, kabilang ang SWAT, Station Intelligence Section at Sub-Station 2, katuwang ang mga tauhan ng District Intelligence Division ng Northern Police District, sa ilalim ng pangangasiwa nina PMAJ Randy M Llanderal, Assistant Chief of Police for Operations, at PCOL Joseph G Talento, Chief of Police, VCPS. Ayon kay PCOL Talento, mahalaga ang kooperasyon ng mga negosyo at publiko sa pagtukoy at pag-uulat ng mga produktong pinaghihinalaang peke o hindi awtorisado.
Mahalaga rin na ang mga negosyo ay tiyaking lehitimo at mula sa awtorisadong sources ang kanilang mga produkto, upang maprotektahan hindi lamang ang kanilang negosyo kundi higit sa lahat ang mga mamimili.
Patuloy namang nakikipag-ugnayan ang Valenzuela City Police Station sa Pamahalaang Lungsod ng Valenzuela at iba pang concerned agencies upang mapanatili ang seguridad ng publiko at makatulong sa pagpigil sa pagkalat ng mga pekeng produkto sa komunidad.(Roger Panizal)
WANTED SA PALAWAN, TIMBOG SA NUEVA ECIJA
Nagwakas ang paghahanap sa isang lalaki na kabilang sa most wanted persons sa Palawan matapos itong maaresto sa isang manhunt operation sa Barangay Gabaldon, Science City of Muñoz, Nueva Ecija.
Kinilala ang suspek sa alyas na “Fred,” 31-anyos, isang magsasaka at residente ng Barangay Panacan 2, Narra, Palawan.
Ang akusado ay nahaharap sa anim na bilang ng qualified rape of a minor at walang inirekomendang piyansa ang korte.
Ayon sa Palawan Police Provincial Office (PPO), matagumpay na naisagawa ang operasyon matapos ang koordinasyon ng mga operatiba mula sa Palawan, Nueva Ecija at Nueva Vizcaya.
Pinangunahan ng Narra Police Station ang manhunt operation, katuwang ang mga tauhan ng Science City of Muñoz Police Station.
Base sa warrant of arrest, matagal nang hinahanap ang suspek kaugnay ng mga kasong isinampa laban sa kanya.
Ang warrant ay inilabas noong Abril 28, 2026 ng Regional Trial Court Branch 13-Family Court sa Puerto Princesa City.
Ang mga kasong kinakaharap ng suspek ay isinampa sa ilalim ng Revised Penal Code, na inamyendahan ng Republic Act No. 11648, kaugnay ng proteksiyon sa mga menor de edad laban sa mga krimeng sekswal.
Sa kasalukuyan, pansamantalang nakapiit ang suspek sa custodial facility ng Muñoz Municipal Police Station habang inaayos ang kanyang paglipat sa Narra, Palawan, kung saan siya haharap sa korte para sa kaukulang proseso.(Danilo Gravador)
