Sinabi sa ulat ng Japanese public broadcaster NHK na pinag-aaralan ng Japan ang posibilidad ng pag-export ng surface-to-ship missiles sa Pilipinas bilang bahagi ng pagpapalawak ng kanilang defense export policy at mas aktibong papel sa seguridad sa rehiyon.
Nakasaad sa ulat na tinalakay ng defense ministry ng Japan ang posibleng missile exports matapos amyendahan ang matagal nang restriksyon sa pagbebenta ng armas sa ibang bansa, na ngayon ay nagbibigay-daan na sa export ng warships, missiles, at iba pang military equipment.
Ang hakbang na ito ay kasunod ng patuloy na tensyon sa pagitan ng Japan at China, partikular sa usapin ng Taiwan, na nagdulot ng malamig na relasyon sa dalawang bansa.
Nauna nang inihayag ng Japan ang planong pagbibigay sa Pilipinas ng ilang defense assets tulad ng Abukuma-class destroyers at TC-90 aircraft.
Ayon sa tagapagsalita ng Department of National Defense ng Pilipinas, nagpapatuloy ang talakayan ng dalawang bansa kaugnay ng posibleng pagbili at paglipat ng defense equipment.
Nabanggit din sa ulat na nagsagawa kamakailan ng joint maritime exercises ang Japan, Estados Unidos, Australia, at Pilipinas, kung saan pinaputok ang Type 88 anti-ship missile.
Ang Pilipinas at Japan ay bahagi ng tinatawag na “First Island Chain,” isang estratehikong hanay ng mga isla na mahalaga sa seguridad sa rehiyon at sa umiiral na tensyon sa China.
Related Posts
