DTI, naka-alerto sa posibleng pagtaas ng presyo ng bilihin dulot ng oil price hike

Nakatutok ang Department of Trade and Industry (DTI) sa posibleng pagsipa ng presyo ng mga pangunahing bilihin sa mga pamilihan kasunod ng sunod-sunod na taas-presyo sa mga produktong petrolyo ngayong Setyembre.

Agad na inatasan ni Trade Secretary Ma. Cristina Roque ang lahat ng kanilang tanggapan sa buong bansa na palawakin ang pagbabantay sa mga grocery, supermarket, at lokal na merkado upang maiwasan ang hindi makatwirang pagtaas ng presyo.

Tiniyak ng kalihim na magkakaroon ng regular at na-update na ulat ukol sa galaw ng presyo upang makatugon agad ang ahensya sa anumang pagbabago sa merkado.

Nagbabala rin ang DTI sa mga negosyante, pamilihan, at manufacturers na haharap sa mabigat na parusa ang sinumang manananamantala o magpapatupad ng artificial shortage at hindi makatwirang price hike.

Sa kabila ng banta, naniniwala ang DTI na hindi pa kailangang magpatupad ng price cap sa mga bilihin dahil nananatili pa namang kontrolado at manageable ang pangkalahatang sitwasyon.