Pinag-aaralan ng Pilipinas at Netherlands ang posibleng kooperasyon sa critical minerals habang kapwa bansa ay naghahanap ng diversification sa gitna ng mga pangamba sa global supply chains, ayon sa Philippine Embassy sa Netherlands.
Tinalakay ito sa pulong nina Dutch Foreign Minister Tom Berendsen at Foreign Affairs Secretary Ma. Theresa Lazaro sa The Hague noong Mayo 18, kasabay ng paggunita sa ika-75 anibersaryo ng ugnayang diplomatiko ng dalawang bansa.
Inilarawan ni Berendsen ang usapan bilang “fruitful” at binigyang-diin ang pangako na palakasin ang bilateral trade, supply chain resilience, at sustainable growth. Ipinahayag din niya ang suporta sa maagang pagtatapos ng negosasyon para sa Philippines–European Union Free Trade Agreement na inaasahang matatapos sa loob ng taon.
Ayon sa Philippine Embassy, binigyang-diin ng dalawang panig ang pagpapalalim ng ugnayang pang-ekonomiya, lalo na sa water management, semiconductors, smart agriculture, renewable energy, at critical raw materials.
Napagkasunduan din ang pagpapalawak ng kooperasyon sa maritime security, paglaban sa transnational crimes, climate action, environmental protection, connectivity, academic exchanges, at people-to-people linkages.
Tinalakay rin ang mga isyu sa rehiyong Indo-Pacific, kabilang ang sitwasyon sa South China Sea. Bago ang ika-10 anibersaryo ng 2016 Arbitral Ruling, muling pinagtibay ng dalawang opisyal na ang desisyon ay “legally binding and a significant contribution to international law and the interpretation and application of the UN Convention on the Law of the Sea.”
Sa usapin ng pandaigdigang krisis, kabilang ang sa Middle East, binigyang-diin ang pangangailangan ng matatag na energy supply chains, ligtas na maritime trade routes, at proteksyon sa mga seafarer at freedom of navigation.
Itinatag ang pormal na ugnayang diplomatiko ng Pilipinas at Netherlands noong Mayo 17, 1951. Nanatiling isa ang Netherlands sa mga pangunahing foreign investor at trading partner ng Pilipinas sa Europa, kung saan aktibo ang mga kumpanyang Dutch sa banking, enerhiya, manufacturing, agrikultura, at logistics.
Related Posts
