Nagbabala ang National Bureau of Investigation (NBI) sa publiko laban sa mga criminal syndicate na nagpapanggap na government officials at prominent personalities upang makapanghingi ng pekeng sponsorship at donasyon sa pangalan ng mga non-government organizations (NGOs).
Sa public advisory ng NBI, sinabi nitong kinokontak ang mga biktima sa pamamagitan ng phone calls, text messages, emails, at social media, kung saan maling inaangkin ng mga salarin na konektado sila sa mga kilalang NGO upang mapakinabangan ang kredibilidad ng mga personalidad na kanilang ginagaya.
“Reports indicate that victims are being contacted through phone calls, text messages, emails, and social media platforms, wherein perpetrators falsely claim affiliation with recognized NGOs and exploit the trust and credibility associated with the individuals they impersonate,” ayon sa NBI.
Ayon pa sa bureau, gumagamit ang mga grupo ng caller ID spoofing technology upang magmukhang mula sa lehitimo at rehistradong contact numbers ng mga kilalang opisyal o personalidad ang mga tawag at mensahe.
“In certain instances, even return calls may connect to seemingly legitimate lines, further complicating verification and increasing the risk of deception,” dagdag ng NBI.
Sinabi ng NBI na kabilang sa karaniwang palatandaan ng naturang modus ang mga unsolicited message na nagsasabing “selected” ang isang tao bilang sponsor o donor, pagmamadali o panggigipit na agad magpadala ng pera, kahilingan na ilipat ang bayad sa personal o unofficial accounts, at kawalan ng pormal na sulat o dokumentasyon na nasa official letterhead.
Pinayuhan ng NBI ang publiko na huwag agad magpadala ng pera base lamang sa tawag, mensahe, o online communication, at iginiit na “all solicitations must be independently verified through official and trusted channels.”
Pinayuhan din nito ang publiko na direktang makipag-ugnayan sa concerned official o organisasyon gamit ang verified contact details na hindi ibinigay ng nanghihingi, at humingi ng pormal na dokumento, kabilang ang proof of registration mula sa Securities and Exchange Commission (SEC) o Department of Social Welfare and Development (DSWD).
“These syndicates are deliberately exploiting the public’s trust in government officials and respected personalities. We remind everyone that in today’s digital environment, even legitimate-looking numbers and identities can be manipulated,” pahayag ni NBI director Melvin Matibag.
“Vigilance is our first line of defense – verify first before you give. The NBI will relentlessly pursue and hold accountable those who prey on the goodwill of our people,” dagdag niya.
Ayon sa NBI, maaaring i-report ng mga biktima ang mga insidente sa Cybercrime Division nito. Binalaan din ng ahensya na maaaring managot ang mga salarin sa ilalim ng Republic Act 10175 o Cybercrime Prevention Act of 2012, pati sa mga probisyon ng estafa sa Revised Penal Code at iba pang batas.
Related Posts
